Ásta Svavarsdóttir

Mörkuð íslensk málheild
Ég er í verkefnisstjórn tungutækniverkefnis Mörkuð íslensk málheild sem unnið er að við Orðabók Háskólans og miðar að því að safna saman völdum textum í rafrænu formi, greina þá og marka tiltekin einkenni textanna og orðanna sem þar koma fyrir og búa þannig um efnið að það nýtist til orðabókagerðar og við ýmiss konar málrannsóknir.

Orðskýringar fyrir vefinn Ísland.is

Ég ritstýrði orðskýringum fyrir vefinn Ísland.is sem opnaður var í byrjun mars 2007. Verkefnið var unnið fyrir Fjölmenningarsetur á Ísafirði og skýringarnar voru fyrst og fremst miðaðar við þarfir innflytjenda. Um er að ræða rúmlega 1000 orð sem flest tengjast íslensku samfélagi á einhvern hátt, t.d. orðaforði úr stjórnsýslu, heilsugæslu, menntakerfi o.fl. Á síðari stigum var ákveðið að setja skýringarnar á forsíðu vefsins og gera þær þannig aðgengilegar fyrir alla notendur hans.

Lexin - Orðabækur handa nýbúum
Ég var verkefnisstjóri Lexin-verkefnisins, fyrst í tilrauna- og undirbúningsverkefni sem unnið var á árinu 1998 og lauk með ítarlegri skýrslu til menntamálaráðuneytisins í mars 1999 og síðan í orðabókaverkefninu sem unnið var að á árunum 2002-2005.

Verkefnið fólst í því að laga sænskan (og a.n.l. norskan) orðabókargrunn að íslensku og ganga í framhaldi af því frá orðabókum milli íslensku og annarra mála á grundvelli hans. Þær eru sniðnar að þörfum byrjenda í íslenskunámi, bæði barna og fullorðinna, og ætlaðar til birtingar á vef. Miðað var við að byrja á íslensk-enskri orðabók og fleiri gætu síðan fylgt í kjölfarið. Lexin-stofninum fylgir myndefni sem tengist u.þ.b. 3000 orðum og þegar hlé varð á verkefninu var unnið að því að ganga frá því efni til birtingar í fyrsta áfanga.

Náin samvinna var milli íslenska verkefnisins og norska Lexin-verkefnisins sem unnið er við háskólann í Bergen.

Í tengslum við Lexin tók verkefnisstjóri þátt í fjölda funda og ráðstefna, hélt fyrirlestra um efnið, bæði ein og í samstarfi við norska verkefnisstjórann, og kynnti það á ýmsan hátt (sjá nánar í ritaskrá).

Söguleg orðabókalýsing
Ég hef komið að vinnu við efnisöflun og úrvinnslu efniviðar í sögulega orðabókalýsingu með ýmsum hætti. Þar má nefna aðild að gerð Sýniheftis sagnorðabókar 1993 (sjá ritaskrá) og ýmiss konar vinnu við úrvinnslu og ritstjórn notkunardæma úr ritmáli í Ritmálssafni Orðabókar Háskólans á vefnum. Þessu tengist líka efnisöflun úr talmáli sem ég hef tekið þátt í sem einn umsjónarmanna útvarpsþáttarins Íslenskt mál í Ríkisútvarpinu á árunum 1996-2003.

Umfjöllun um orðabækur og orðabókafræði
Ég hef tekið þátt í mörgum ráðstefnum um orðabókafræði, innan lands og utan, og haldið erindi og skrifað greinar á því sviði (sjá ritaskrá).