Nýtt í textasafni: Talmálsefni

Nýr efnisflokkur hefur nú bæst í textasafnið, "Talmál". Um er að ræða umritanir á rúmlega 50 klst. af töluðu máli sem var hljóðritað á árunum 2000–2006 og unnið úr í tengslum við rannsóknarverkefni sem starfsfólk OH hefur átt aðild að. Gögnin geyma dæmi um talmál fjölmargra Íslendinga á ýmsum aldri, þau eru fjölbreytt að efni og af ýmsu tagi: opinberar umræður, samtöl og viðtöl. Textinn er skráður nákvæmlega eftir hljóðritunum með venjulegri stafsetningu, þ.m.t. hikorð, endurtekningar, ófullgerð orð, frammígrip og önnur einkenni talaðs máls.

Talmálsgögnin eiga rætur að rekja til eftirtalinna verkefna:

  1. ÍSTAL – Íslenskur talmálsbanki (verkefnisstjóri Þórunn Blöndal), þar sem sjálfsprottin, óformleg samtöl fullorðins fólks voru hljóðrituð og skráð; þetta verkefni var unnið fyrir styrk úr tæknisjóði Rannís 1999-2000 og það vinnulag við skráningu gagnanna sem þar var mótað hefur verið haft til hliðsjónar við vinnslu annarra talmálsgagna.
  2. MIN – Moderne importord i språka i Norden (verkefnisstjóri Helge Sandøy), þar sem m.a. voru hljóðrituð viðtöl við fólk um erlend máláhrif. Leyfi fékkst til að vinna frekar úr íslensku viðtölunum og nýta þau til rannsókna.
  3. Hvernig tala ungir Íslendingar í upphafi 21. aldar? (Sigrún Ammendrup og Ásta Svavarsdóttir), verkefni styrkt af Nýsköpunarsjóði námsmanna sumarið 2006. Þar voru hljóðrituð samtöl fjögurra ungmenna um tiltekið umræðuefni, annars vegar við jafnaldra sinn og hins vegar við sér eldri viðmælanda, alls 8 samtöl.
  4. Tilbrigði í setningagerð (verkefnisstjóri Höskuldur Þráinsson), sem er rannsóknaverkefni sem nú er unnið að fyrir öndvegisstyrk frá Rannís. Undir merkjum þess verkefnis hefur verið gengið frá gögnum úr öðrum verkefnum, s.s. ÍSTAL og MIN, en einnig hefur verið aflað texta frá Alþingi og gengið frá þeim á sama formi. Ásta Svavarsdóttir, fræðimaður á OH, hefur haft umsjón með þeirri vinnu.