Tímaritið Orð og tunga

Tímaritið Orð og tunga er gefið út af Orðabók Háskólans og birtir greinar á fræðasviði stofnunarinnar, einkum um orðabækur og orðabókafræði en einnig um orðfræði, einkenni og sögu íslensks orðaforða, afmarkaðs hluta hans eða einstakra orða. Enn fremur birtast í hverju hefti greinar um fyrirfram ákveðið þema sem byggjast á framsöguerindum og umræðum á málstofu sem efnt er til fyrri hluta ársins. Auk fræðigreina birtir tímaritið fræðilega ritdóma og umsagnir um orðabækur, handbækur og önnur verk sem snerta fræðasvið þess, kynningar á orðabóka- og rannsóknaverkefnum sem unnið er að og fréttir um ráðstefnur, fundi, ný og áhugaverð rit á fræðasviðinu o.fl. Gert er ráð fyrir að greinar séu að jafnaði skrifaðar á íslensku en einnig verða birtar greinar á ensku, dönsku, sænsku og norsku. Hverri grein fylgir stuttur útdráttur um efni hennar og helstu niðurstöður á ensku; sé greinin rituð á erlendu máli er útdrátturinn á íslensku. Orð og tunga er ársrit og er miðað við að það komi út síðla hausts.